港股表現反覆，上周五收市跌穿早前預期的25,800至26,300點的波幅區間，不過與25,800點的支持位相去不遠，可能只係假摔而已，但如果再跌，下一級就要睇25,200點，短線計又唔使太慌張。
目前市場充滿負面因素，只係早前缸邊友沉醉於A股「健康牛」的憧憬中，明知山有虎、偏向虎山行。誰不知上周國家隊大手減持、主要媒體更有瘋牛不利股市等報道帶風向。官方出手調整升市節奏，短線來計可能有壓力，但中線嚟睇反而有利，因為升得急通常好快玩完，慢牛先至持久。若相信A股帶動港股向上，可考慮逢低買入。
不過，有睇開專欄的看官，都知老古成日講嘅負面因素，排頭位就係地緣政治，第二就係疫情發展。而香港連日新增多宗新冠肺炎確診個案，出現大爆發，確實令人擔心。老古都係嗰句，入市可以、切忌瞓身，否則心理壓力太大，反而不利坐貨食盡個浪。
照目前嚟睇，內地A股可能進入牛市，利好中資券商股，可留意小注搭順風車的機會。過去多年A股一沉不起，中資券商股普遍於低位浮沉多年，近日隨A股轉旺而起死回生，不過炒還炒，普遍股份仍然蟹貨重重，升起上來阻力較大。今次介紹3隻近日曾創歷史新高或貼近高位的中資券商股，貪佢哋上方冇乜蟹貨，輕身上陣、爆發力更強。
當中規模最大的中金公司（03908），三月至六月營造圓底向上，升穿頸線16元水平後，七月七日高見20元，近日股價陷調整，建議貼近10天線17.5元小注入市，上方較大阻力為21元，向下跌穿20天線以16元止蝕。
走勢最強的中信建投証券（06066），七月六日創出13.74元歷史新高後反覆回落，上周五收報12元，配合其最近公布六月純利按年升逾1倍，料後市仍有可為，可喺10天線附近即11元上車，短線上望13.7元，向下跌穿10元止蝕。另外，招商證券（06099）早前宣布供股，令股價由七月六日高位14.62元跌逾兩成，宜先觀望10天線可否守得住。
古勝