Market Insight：板塊輪動 車股博得過

睇番指數，港股上周五企穩25,300點樓上收市，照睇近日氣勢，唔排除短線再升多浸，恒指挾勝上衝26,000點不是夢。但話說回頭，各位缸邊友千祈唔好畀勝利沖昏頭腦，呢刻不宜重手加注入市博。點解老古會咁講？

皆因目前美國疫情仍肆虐，完全談不上重啟經濟，特朗普過去三年善長的經濟牌已失效。正所謂狗急跳牆，特朗普要贏大選，可用來扭轉乾坤的手段只剩中國牌。屆時兩國關係會點樣發展，老古都冇水晶球，但各位一定要留意呢個風險及其連鎖反應，包括香港能否維持國際金融中心的地位？香港各行各業的精英會否大量移民？屆時，香港對內地的作用自然亦都無足輕重，屆時港股、港樓會點？

國策扶持 保就業關鍵

形勢會唔會咁樣發展？誰又能說得清楚，但做「最壞的打算，最好的準備」，一定唔會有錯。雖然重錘出擊唔適合，細注一博則可以考慮。老古對汽車股的信心多一啲，因為內地經濟不景，必須谷內需提振經濟，而作為重工業的汽車業，涉及的供應鏈眾多，亦是保就業的關鍵，相信會是政策重點扶持的行業。

汽車板塊上周五幾乎全線向上，比亞迪股份（01211）收報67.9元飆逾13%；華晨中國（01114）則升近13%，收報8.27元；至於吉利汽車（00175）升逾12%，以14.16元收市。以近月港股強者恒強的規律，若然覺得汽車股仲有得炒，不妨在此尋寶。

當中比亞迪的平均線全數向上，強勢畢現，短線阻力位73元，向下跌穿63元止蝕。吉汽則突破今年一月以來的降軌，技術走勢向好，短線阻力位在15.3元。至於技術走勢最靚仔的華晨，似足頭肩底，上周五一舉升穿8元水平的頸線位，短線阻力位為9.3元。

展望本周，港股各板塊輪動的趨勢明顯，甚至有啲禾雀亂飛的感覺，呢場音樂椅盛宴會喺幾時曲終？自然冇人知曉，大家只能見步行步，但在下跌信號出現前，螳臂當車式的開Put則可免則免，做對沖另計。