絲絲講場：購物欲激發8歲仔營商頭腦

為買錶整香薰蠟燭賺錢

原來今年十三歲嘅澳洲細路，幾年前已開始創業，至今儲咗人生第一桶金。話說好鍾意了解新科技嘅Tadyn Flood（塔頓），八歲時扭阿媽買Apple Watch遭拒絕。但塔頓並唔似其他小朋友，佢一路盤算點樣靠自己買到呢隻手錶。

之後佢喺網上搵手工香薰蠟燭嘅製作方法，經過一段時間後，佢嘅製作手藝愈嚟愈好，仲開埋網頁，短時間內已賺得1.5萬美元（約11.7萬港元）「巨額」，其後收入亦繼續進帳。如今佢除咗可以買自己心愛嘅科技產品外，而且仲可以定期儲蓄，仲會抽出部分捐給弱勢社群。

塔頓媽媽分享，創業之路令塔頓更加成熟懂事，甚至對佢學業都有幫助！原來之前佢做學校功課做到好頭痛，但隨住佢要用心打理自己盤生意之後，一切就朝住好嘅方向發展！

余絲韻