絲絲講場：糖果賣得好 經濟先有甜頭

疫情下，港股、美股表現都唔算差，我哋呢班港女喺股場上賺咗唔少，自必然要瘋狂購物同食甜品填補吓心靈上嘅忐忑！

銷售挫預示全球衰退

到底糖果銷售點預測經濟呢？有外國媒體講，近期全球糖類消費下跌，可以話係過去40年來未有嘅異象，甚至會對經濟帶嚟連鎖效應！

話說原來可口可樂公司今年四月首三個星期銷售額大減25%；百事可樂亦預期次季銷售唔太可能出現正增長。美國政府同花旗都認為，今年次季消費者對糖類需求將會下降，而且會創下四十年以來未見過嘅紀錄。根據供應鏈服務商Czarnikow預測，本季全球糖類銷售額將跌1.2%。

而由於糖類唔係必需食品，反而同工作、社交、餐廳，以至電影、運動等各種經濟活動息息相關，所以有專家就話，糖果類銷售下滑，其實亦預示咗全球經濟衰退，而全球經濟可唔可以重振，都係睇糖類銷售數字。

講開糖，仲有一個叫甜甜圈經濟學，講求平衡嘅理念。意思係全球經濟唔會永無止境地向前，反而會好似甜甜圈講究均衡先係最靚！呢個概念有埋書去講解，唔單只應用喺環球經濟層面，連企業管治層面都適用。但絲絲所認知嘅係，經濟與通脹向前，代表人類生活改進，股市先可向前衝。新一套理念，絲絲都要啲時間揣摩！

余絲韻