過去三日，恒指一路夾住喺10天及20天線之間；放大嚟睇，沿今年初高位及三月份低位分別畫出降軌及升軌，交匯處正是目前恒指所在的橫行區，等爆邊的格局相當明顯。至於係爆上定爆落，相信好多缸邊友都想知。
但係冇人可以百分百正確判斷後市，但基於以下三個原因，筆者睇法相對悲觀。第一，自然係地緣政治因素，局勢好似隨時會爆的炸彈。同時亦牽引香港自身的政治因素，或引起外資、港人的沽貨潮。最後則是內地、環球的經濟仍然不容樂觀。就算短線爆上，中線向下調整的機會大於一切。既然係咁，建議仍睇好者在追逐短線回報的同時，要戴定頭盔、切忌瞓身。
個股方面，防守性相對高的內銀股，可考慮趁低吸納。雖然環球經濟不景，對「百業之母」同樣有打擊，但內銀股作為國家企業，仍然不失為穩陣的收息之選，尤其係目前股價相對低殘，向下的空間有限。以工商銀行（01398）為例，昨收報5.11元，股價貼近三年低位，過去三個月大致於4.9至5.2元之間徘徊。股價料短線仍有機會向下調整，建議於5元邊分注入市，中長線望5.5元，向下跌穿關鍵大位4.8元止蝕。
古勝