Market Insight：新經濟股呈強趁勢追

騰訊成定市神針

老古之前一路提醒，今年正值多事之秋，唔係瞓身買貨的時候。最近三個月，環球金融市場面對疫情肆虐、地緣政治愈玩愈大鑊、實體經濟每況愈下，卻持續反彈，有種脫離現實的荒謬感覺。除咗港股衝上近月高位，美股更係氣勢如虹，納指創下新高。就連買股相對保守的股神巴菲特，都因為低位沽貨而被唔少「後起之秀」恥笑。但事實證明個市並唔係想像中咁穩陣，道指上周四就單日插1,861點。巴菲特近期唔夠「貪婪」係唔係錯？相信仲未有定案，大家不妨拭目以待。

話說回頭，港股上周坐完過山車，對新經濟股卻影響不大，繼續跑贏大市，相信中短線仍會有資金追捧，如果仲想博上去，就要有智慧不如趁勢，繼續追逐新經濟股，每次回調可能都係上車機會。該板塊都係以騰訊控股（00700）、阿里巴巴（09988）及美團點評（03690）為首，前者作為藍籌成分股，係托市資金標的股，股價相對強勢，目前支持位介乎428至430元，主要阻力位為前頂475元水平。

至於早已有高處不勝寒感覺的美團，真係升到你唔信，但在資金追捧下，就算唔買都唔好沽住，千祈唔好螳臂當車，有貨者不妨繼續放紙鳶。三者中相對落後的阿里，爆發力明顯遜色，不過亦逐級逐級上，仍有機會創新高，向下支持位為200元。

展望本周，有唔少重要的經濟數據出爐，中國將於周一公布五月調查失業率、零售銷售數據、規模以上工業增加值及城鎮固定資產投資年率；周二則有英國五月失業率及零售銷售數據；周三分別有英國及加拿大的消費者物價指數；周四輪到澳洲公布五月失業率；周五就有日本公布五月全國消費者物價指數。

雖然美國近日再陷第二波疫情的陰霾，但北半球大致上已過疫情高峰，經濟重啟開始見成效，但唔代表未來將會順風順水，各位股民仍然要提高警覺，保本依然係今年的主軸。

古勝