Market Insight：政治市要睇住國策搵食
港股周二繼續做好，但受制於24,000點關，恒指收報23,995點，升263點。畢竟如今中美兩強對敵，美國愈係要打香港主意，中國就會愈保護香港不許冧。呢啲叫做政治市，唔可以用常理來推斷，股民必須清楚正身處這大變局，免得進退兩難。
內地經濟有復甦迹象，唔少內需股已率先衝頂，好似尋日青島啤酒（00168）、李寧（02331）、國美零售（00493）股價均創出近年新高。而受惠幾隻內地科網巨企排隊來港上市，香港交易所（00388）股價亦創出52周新高。總而言之，入市策略要順國策而行，自可增勝算。
中美貿協有機會作廢
有消息指內地已指令部分國企暫停購買美國農產品，若消息屬實，演變下去，分分鐘係中美首階段貿易協議作廢，意味美國總統特朗普在任的其中一項「重大政績」將會化零，而往後中美關係再度惡化係大概率的事。在呢種大環境下，香港注定風雨飄搖，香港人又好，投資者又好，一係選擇離場，一係就選擇留下，「順」住國策而為，自然搵到生存之道。
事實上，香港雖然內憂外患，但正正因為來自中國的支持，港股變得更有可為，呢一個說法，雖然唔容易獲大部分人認同，但老古相信未來股市會證明呢個論點正確。港交所仍然係呢個升浪的首選股份，而其他無論係傳統抑或新經濟股，都記得兩個選股準則，其一係非中資背景不買，其二係非龍頭企業不買。
另外，阿里巴巴（09988）又上番200元邊。睇走勢，短線若能以大成交突破210元關，可以追買；但若再次受制於210元關回落，即次季以來第三次受制於該水平，則宜待回試190元承接再作考慮。
古勝