絲絲講場：都市麗人CEO賣Bra有賢內助

中國市場發展空間大

Adrian話，首先係覺得同新同事啱Feel，況且要挑戰自己，呢個係工作生涯嘅重要元素。依家擺在眼前嘅係︰內地內衣市場仲有好大發展空間，舊年公司品牌喺內地市佔率唔夠15%，而規模同中國差唔多嘅歐美地區，三大品牌總市佔率反而超過50%。佢相信，淨係品牌整合已經有得做，而且「經濟好唔好啲人都要買底衫褲」！呢方面絲絲都覺得有道理，近排人人戴口罩出街，啲化妝品都可以慳番，反而底衫褲就無得慳！

邊學邊做 靠同事惡補

Adrian希望公司衝出海外，等Cosmo Lady打入世界前三，甚至榜首！公司今年會進軍巴基斯坦，佢話當地貼身衣物基本上未開發，而且零售渠道以購物中心為主，適合開設集團轉型計劃策略之一嘅生活家居館。

但話時話，Bra Top同Bra已經係兩回事，佢又點增進相關知識？Adrian話，有產品部同事幫佢惡補之餘，太太都會畀Feedback，而佢作為舵手更重要嘅係去視察環境，尤其是望吓對手做啲乜，所以要全國四圍走，連陝北都要去！

余絲韻