絲絲講場：恒生陳紹樂瞓身谷特惠貸款
專為中小企而設嘅「百分百擔保特惠貸款」推出咗成大半個月喇，每間企業嘅最高貸款額可以去到成400萬港紙，好多銀行都開行Turbo搵客。
絲絲八到，恒生銀行（00011）商務理財業務總監陳紹樂（Amos）瞓晒身跑數，單係一個人搵咗成800幾個客，經常要三更半夜先至收得工。
「疫」市需求大增
坦白嚟講，喺依家「疫」市底下，企業需要比較多嘅資金去周轉，聽人講Amos近排就做到冇停手，每日佢嘅Schedule（行程表）都排到密一密，成日都要周圍騰。
百分百擔保計劃由四月二十日開始接受申請，Amos去咗十幾個廠商會同唔同企業家見面，同大家仔細解釋各項申請細節同流程，一個人嘅搵客量絕對唔講得笑。
不過咁，Amos你啲數咁跑得，跟住你班同事都好大壓力喎，成績理想嘅話，嚟緊會唔會獎勵或慰勞吓班同事先！
余絲韻