疫情肆虐搞到香港人提心吊膽，焗住要減少戶外活動，身心健康都響起警號。滙豐就好着重員工呢方面喇，疫情期間大部分人Work From Home（在家工作），都安排唔少網上健體課程同埋心靈講座，除咗幫員工排憂解悶外，仲可以操練精、氣、神，保持最Fit狀態！
絲絲八到，滙豐喺三月底開始安排咗唔同節數嘅網上視像健體課程，有專業導師教大家拉筋、正確坐姿、肌肉訓練等，每節15分鐘，仲有中英雙語教學，認真貼心。
聽聞課程反應相當熱烈，到依家已經舉辦咗5次，每節都有超過400個員工參加。除咗動態之外，靜態活動亦一應俱全，提供唔同網上抗疫講座，例如有中醫食療、靜觀等。聽講滙豐台灣亦有類似安排，二月開始安排網上心靈講座，嘗試減少員工嘅焦慮。
余絲韻