大熱天時，絲絲出街都鍾意買番杯珍珠奶茶消暑，發現中式奶茶店梗有一間喺左近。喺中國中式奶茶店開到成行成市，形成「奶茶經濟」，除咗反映中國嘅中產人數上升，亦代表新一代嘅創業夢！講到奶茶店最密集嘅地區，估唔到原來係東莞。
一杯奶茶喺內地平均賣15元人民幣，唔算得上係普羅大眾可輕易負擔。但內地中產人數上升，就可由近年奶茶店數目急升反映。依家全中國有超過40萬家奶茶店，而東莞、上海、廣州、深圳、成都同重慶各自都有過萬家奶茶店，廣州更有近兩萬家。至於奶茶店密度最高嘅地方係東莞，平均每1,000人就有1.42家奶茶店喺左近。喜茶、奈雪之茶等大牌子外，小商戶搞嘅奶茶店都唔少！
市場估中國奶茶行業規模近千億元人民幣，唔係亂估，係按內地有56%人介乎15至45歲、城鎮比率57.35%、每人每年平均購買14.3杯奶茶同每杯奶茶平均15.2元人民幣計出嚟。
奶茶行業有咁大商機，部分人更深信開奶茶店係脫離打工一族嘅階梯。因此，唔少開奶茶店嘅創業者都介乎28至33歲間。但奶茶店入場門檻低，競爭又激烈，據內媒統計，能生存下來嘅奶茶店只有18.8%。依家奶茶店平均嘅純利率得11%，與星巴克嘅約20%有一段距離，守業唔容易。如果依家先考慮加入戰團，就要搞清楚定位，係重質定重量。
余絲韻