Market Insight：憧憬退「疫」 零售股尋寶

港股四月份似乎喺度整固蓄力，雖然上月下旬試過跌穿10天、20天線，但好快爬番起身，最終上埋50天線，收報24,643點，大有上補三月中旬24,657至25,231點下跌裂口的氣勢。不過，港股亦連續四個交易日成交額不足900億元，反映市場仍有疑慮，但短線嚟講，熱錢持續流入香港，後市有望升多一浸。正所謂有智慧不如趁勢，自問轉身夠快，都可以考慮短炒一轉，但要小注怡情。而之前已經睇淡的缸邊友，都係畀啲耐性等待調整！

莎莎可望上試1.6元

隨着全球疫情有見頂迹象，投資氣氛趨向樂觀，利好消息充斥市場。首先係懸而未決的內地兩會，終於落實喺五月底召開。其二，新冠肺炎的疫苗及有效藥物研發不時傳出好消息。另外，香港已經連續多日未有本地確診個案，雖然最新失業率升到4.2%，但係悶咗三個月的市民，仍然空群出動消費。若想博多一浸，不如試吓喺本地零售板塊入面尋寶。

尤其係主營生活用品的零售股，屬於民生所需，自然快啲復甦。莎莎國際（00178）走勢唔錯，形態似足小圓底，可以1.4元附近小注入市，上望圓底頂部約1.6元，向下以20天線1.26元做止蝕。銷售零食為主的CEC國際控股（00759），可能係疫情最受惠股，皆因人人困在家中，零食應該比較暢銷，但要提醒大家，呢隻股票成交量偏低，一定要細注。

地緣政治左右後市

至於屬於高消費的珠寶、鐘錶相關公司，應該會最遲復甦，但六福集團（00590）走勢轉好，過去一個月大致喺14至16元之間徘徊，近日衝破橫行區間，如果進一步企穩50天線即16.7元樓上，料上望100天線19元水平，向下跌穿20天線15.5元便止蝕。

展望本周，周一、周二分別公布香港首季GDP及三月零售銷售數據，周五則有美國及加拿大四月失業率。而近期環球股市，尤其係美股大反彈，係咪代表世界經濟冇事？老古認為唔係，最終要睇實體經濟及就業表現，因為困境並唔會因為金融市場大升而短期內改善，尤其今年係美國總統大選年，環球陷入「疫」境，地緣政治必定成為操縱選情的工具，進而主導環球經濟及股市，投資者不可不防。

古勝