Market Insight：港股湧現抽水潮

喺火燒連環船的恐懼之下，市場信心並冇大家想像中咁堅定，隨時觸發人踩人，一如三月十九日發生的不問價斬倉事件。

不過，喺大冧市發生之前，又有誰可以真正估到幾時出現？唯一可以做就係作出防範，控制入市注碼，正所謂君子不立危牆之下。

講起上市公司及大股東抽水潮，最近好多板塊都輪流加入，計有內房、醫藥、5G設備、汽車、燃氣及手機股等。上周五連軟件股都抽埋一份，講緊就係金山軟件（03888）及金蝶國際（00268）。金山軟件擬發行31億元二○二五年到期的0.625厘可換股債券，初步每股換股價逾35.7元。惟上周五股價跌逾6%，報26.15元，跌穿10天線，走勢轉弱，可能要抖一抖。

另外，外媒指，金蝶上周五遭京東子公司以每股11.6元減持3,400萬股，套現逾3.9億元。該股最終收報11.6元，不單止企穩配股價，同時守住10天線上，走勢相對好。

慎防地緣政治灰犀牛

事實上，港股由三月十九日低位21,139點反彈至四月十七日高位24,666點，期間升逾3,500點，雖然短期升幅唔錯，但都談唔上高位出貨，卻已吸引唔少上市公司及大股東急不及待套現，係咪春江鴨？看官可自行判斷。

展望本周巧遇佛誕及勞動節，全周得番三個交易日，相信大市氣氛趨向淡靜。而周一將公布香港三月進出口數據，周二至周四美國將公布四月諮商會消費者信心指數、第一季GDP數據、美國聯儲局議息結果、中國四月官方製造業採購經理人指數、德國四月失業率及歐元區四月核心消費者物價指數。上述數據都與缸邊友息息相關，敬請留意。

最後，老古覺得隨疫情逐步走向受控，地緣政治可能成為國際金融市場的灰犀牛，希望大家提高警覺，切勿視而不見。

古勝