絲絲講場：朱古力測市 準過大師？

海嘯時可可豆需求跌

佢分享外國傳媒講全球朱古力需求與經濟息息相關，例如上次○八至○九年金融海嘯嗰陣，全球可可豆需求下跌，而近排又再度下降。

佢哋訪問咗7位專家同業界人士，顯示全球朱古力消費最大嘅歐洲地區，今年首季需求可能跌1至11%，北美地區更可能跌3至7.5%。由於國際需求衰退，啲專家估計亞洲地區工廠嘅加工量將大減9%。有大宗商品諮詢機構話，新冠肺炎疫情愈趨嚴重，會令甜品需求繼續跌，第二季銷售仲會差過第一季。

若果推測正確嘅話，咁我哋啲小股民依家係火中取栗，要小心行事。不過，絲絲反而逆向思維咁諗，食朱古力會令人開心，咁經濟唔掂又被裁員，平平哋食多兩粒氹自己開心，咁朱古力銷量應該要上升喎！

余絲韻