絲絲講場：基金跌市留客引經據典
新冠肺炎衝擊環球股市，就算頭腦精明嘅絲絲，都蝕咗少少旅費，好彩蝕錢唔使同人交代。不過，管理幾億，甚至係幾十億嘅基金經理又點會唔頭痕？唔知佢哋近排又點向大戶、小戶交代成績表？呢位芬佬為咗安撫人心，直頭要引經據典添！
施羅德引用邱吉爾名句
基金經理同客人交代嘅嘢，不外乎兩樣，就係過去虧蝕嘅失策同未來賺錢嘅方法。管理施羅德人壽多樣化成長基金嘅基金經理就喺投資者信中，引用英國已故首相邱吉爾嘅名句嚟形容當前金融市場形勢：「現在並不是終結，甚至連終結的開始也不是，但也許是開始的終結。」背後意思係形勢好難推測，客人要靜待反彈。收到信嘅投資者唔知收唔收貨呢？
港私募：價值投資天堂
但喺香港成立嘅私人基金（只供資產達800萬元或以上專業投資者購買）Chartwell Capital創辦人兼投資總監陳惠仁就覺得，後市走勢唔算模糊，亦唔使等咁耐！佢更積極同客人解釋，話依家就係價值投資者嘅天堂，亦即佢嘅天堂。仲激動咁講，「等到頸都長，終於輪到我（發圍）啦！」佢形容依家股市為準備起飛嘅飛機，會有強勁向上動力！
佢仲話，依家市場上仍有唔少平貨可撈，建議股友分段入市。佢深信疫情遲早會過去，預計未來爆升得最勁嘅股份會係負債權益比較低嘅公司，例如領展房產基金（00823）。
目前佢嘅基金組合揸住四成港股同兩成日股，其餘係東南亞股票，但「零」A股！佢話，最唔開心係A股喺今次疫市中跌得太少，所以無得博反彈。
余絲韻