Market Insight：華放水谷內需 車股勢踩油

不過，港股三月十九日低位為21,139點，與今年高位29,174點比較，累跌8,035點，依家整個跌浪已經反彈咗超過四成，如果反彈一半即係25,100點水平，與現價亦相差唔多。恒指仲可以升幾多？看官自行判斷，但老古要提醒大家，依家入市一定要控制注碼，免得贏粒糖輸間廠。

話說回頭，市場期待內地推出規模龐大的財政刺激政策，相信谷內需係其中重點。眾所周知，汽車業面對近年內地經濟下行，加上新冠肺炎疫情打擊生產及銷售，行業陷入困境。

工信部數據顯示，內地首季汽車銷量367.2萬輛，大跌超過四成。對此，內地由中央各部門乃至各地方政府都研究推出措施刺激汽車銷售。例如國家財政部有意延續新能源汽車的財稅支持，近日仲有江蘇及廣東兩個經濟大省加入刺激汽車消費行列，未來有望一改銷售頹風。

吉汽炒落後 睇12.8元

當中，股價相對落後係龍頭吉利汽車（00175），勝在市值及流通性高，近期股價大致喺11至12元上落，缸邊友可以考慮喺11蚊邊小注入市，上望50天線12.8元水平。

至於華晨中國（01114）及長城汽車（02333）市值相對細，上落幅度亦比較大，適合進取股民，前者股價企穩三月底至今的升軌上方，同時位於多條日線之上，有望挑戰8元關；至於長城汽車近日於5元徘徊似作整固，但係技術形態唔夠前兩者靚。

展望本周，周一將會公布香港三月失業率，周二至周五分別有德國四月ZEW經濟景氣指數、英國三月消費者物價指數、日本四月日經製造業採購經理人指數、日本三月消費者物價指數及美國三月耐用品訂單月率，能反映發達國家的經濟現況。老古相信上述數據沒有最差只有更差，各位入市短線炒作記得轉身要夠快。

古勝