絲絲講場：芬佬無為投資法勁賺
新冠肺炎疫症之下，環球股市曾經股災式下跌，絲絲作為小投資者，當然忍唔住沽出咗啲好股，如今好揼心！試想在世間，點樣嘅投資先係最強？呢位基金經理（芬佬）就遵從無為而治方案。
管理大約10億元人民幣資產嘅深圳賽亞資本管理創始人羅偉冬靠佛系投資，旗下嘅中國小型股投資組合係今年首季竟然大賺58%。原來佢管理嘅中國小型股公司投資組合自一六年以來就無再買入任何股票；而過去幾年亦無沽貨。結果今年贏到開巷，自一五年基金成立以來仲累賺超過18倍，假設原來資本1,000元，到今年三月三十一日價值已升至19,000元。
僅持五股份 「貴精不貴多」
至於買咩股會有咁好嘅回報？佢分享，投資嘅企業貴精不貴多，基金持股數量一般係五隻左右。業務主要係為中國14億人服務並有巨大增長潛力先得。而在下注前，佢都有十足信心公司股價未來會勁升10倍以上。而且，佢會參考兩個客觀指標，包括企業營業收入及淨利潤複合增長率，並且確保上述收入及純利主要由公司嘅主營業務而來，而唔係靠新投資所帶動。
要Pass晒以上嚴謹嘅選股條件，佢坦言愈嚟愈困難。其實佢無正確披露過持股，但就同傳媒分享過，自己職業生涯中遇到嘅大贏家股票包括內房股保利地產（600048.SH）及廚房電器龍頭企業老板電器（002508.SZ），兩者股價喺二○一五至一八年間的升浪中，分別上漲三倍及五倍！至於佢個人做過最賺錢嘅交易，係喺一二年買入金融科技公司聚龍股份（300202.SZ），兩年內淨賺近四倍。
余絲韻