依家四圍都唔去得，咁可以做啲乜？喺網上掘金嘅主播就諗到財路！大家唔好以為直播經濟只係濕碎錢，據報上年中國直播電商行業總規模達到4,338億元人民幣，今年市場規模更有望突破9,000億元人民幣，係現時最火熱嘅新興商業模式之一。喺疫情下，呢個行業反成為逆市奇葩。
直播分成兩種，一種係展示個人動態等，另一種喺內地叫「直播帶貨」，即係一路賣嘢，講明係Hard Sell。隨即衍生出如同分析師嘅直播帶貨專家，教你直播時賣乜嘢先最賺錢，有八類產品毛利率達六至八成，包括化妝品、護膚品、服裝、鞋袋、美食、數碼產品、飾物同玉石。讀者可以留意到係美容扮靚相關，絲絲就好明白女人錢最易賺嘅道理！
如果只係想展示個人生活，就要諗啲招數。幾年之前有個南韓女主播直播自己食飯片段，都可以賺到笑！近期內地主播唔只直播食飯、健身同購物，最搞鬼係直播瞓覺。話說早前武漢封城，一路都有玩開直播嘅主播，因為隔離太無聊，忽發奇想「直播睡覺」，畀網友監察自己瞓覺有冇扯鼻鼾，結果吸引到54萬人次觀看，粉絲數目亦暴增到近百萬人，期間佢賺到超過等值8萬港元打賞（包括禮物及金錢）。
內地人口眾多，直播固然有商機。所以連香港貿發局都寫過有關內地直播嘅經濟文章，等港商都可以參考吓，令到自己思維更加廣闊。既然咁有財路，絲絲都應該諗諗，係咪可以網上直播自己Keep Fit、化妝等等扮靚過程先！
余絲韻