Market Insight：疫潮蔓延 亂世藏金

高盛唱好 上望千八

尤其是金融市場，因為全球一齊放水救經濟，上星期一片欣欣向榮，恒指唔經唔覺已由低位回升逾2,300點，升幅逾一成。如果唔係每日新增確診及死亡數字持續上升，老古仲以為自己身處平衡時空，所以又要提提大家，未來股市仍然會反覆波動，千祈唔好以為已經雨過天青，缸邊友要繼續控制注碼，亂世最緊要保本。

俗語講得好，亂世藏金。尤其係各國減息至貼近零利率，甚至負利率，錢擺銀行無息收，配合無限放水谷經濟，黃金可謂奇貨可居。早前高盛發表報告指，黃金屬於「最後避風港」，假設疫情擴散至第二季，料金價喺六月或之前可突破每安士1,800美元。睇番目前疫情發展，第二季繼續爆發已成定局，金價會唔會見1,800美元，大家不妨拭目以待。

而買金的方法都有好幾種，可以購入實金、紙黃金，甚至是金礦股。當中最貼金價的自然係實金及紙黃金，前者買賣手續較貴，收藏較難。後者手續費低，而且無收藏問題，但就有買賣風險。早前就有美國大型銀行因為疫情影響實金供應，令金價波幅顯著擴大而暫停「紙黃金」網上交易，但呢種情況相當罕見。

至於黃金ETF方面，SPDR金ETF（02840）算是追蹤金價的較佳工具，現時每股基金價格企穩20天線1,162元樓上，可伺機在此附近分注上車。

礦股首選山東黃金

至於金礦股則波動較大，投資者仲要睇番企業管理、採金成本等因素，追蹤金價不算太貼。而港股中的三隻主要金礦股，分別為山東黃金（01787）、招金礦業（01818）及紫金礦業（02899），當中以山東黃金最貼金價，走勢較佳，係金礦股中的首選。

展望本周，周二公布中國三月官方製造業採購經理指數，以及美國三月諮商會消費者信心指數；周五美國則有三月失業率。到時就知疫情對中美兩國經濟的具體影響，可供各位參考。最後，雖然近日股市急彈，但新冠肺炎疫情的威脅仍在，一旦有咩風吹草動，金融市場隨時又再風起雲湧，缸邊友不可不防，都係吼位買金定吓驚先……

古勝