Market Insight:中資電訊股慎防彈散

投資市場變幻莫測,並唔係一句「阿媽係女人」的廢話,而係上周全港散戶真切的感受。恒指上周三跌穿22,500點重要關口;上周四直插落21,139點,正當唔少股友哀鴻遍野、舉手投降,以為港股要見20,000點的時候,當日卻由低位開始反彈;上周五更藉內地擬推數萬億元財政刺激措施的消息,一鼓作氣飆升逾1,000點,以全日最高位22,805點收市,重奪22,500點關。

疫情趨嚴重 影響大

說時遲,那時快,緊貼大市的缸邊友卻喺過去幾個交易日,畀市場左一巴、右一巴,的確唔太好受。所以都係聽老古一勸,自問心血少,不如靠邊站,等大市Chok完之後,雖然會買貴,但起碼坐得安心,好過日日食驚風散。

再講番全球關注的新冠肺炎疫情,意大利因疫情而死亡的人數已高於中國公布的數字,歐洲正式成為第二個武漢;美國亦步入全民抗疫,但只要未來檢疫措施做到足,相信歐美地區的確診人數可望於短期內見高峰回落。反而係香港本身,確診人數近日大幅飆高,以香港的人口密度計,若然喺社區、醫院爆發,後果將不堪設想,對港股負面影響重大,大家不可不防。

而上周五最引人注目的板塊不可不提中資電訊股,中國移動(00941)績後獲得追捧,股價收市飆升13%;中國聯通(00762)升11%;中國電信(00728)升8%。驟眼睇,升勢相當驚人,但睇番上述三隻股份,由三月高位各自跌28至39%不等,當中,以中移的跌幅最少。

雖然話內地為防止經濟持續下行,急於尋找經濟增長新動力而全速推行5G,惟電訊公司是5G產業鏈的下游企業,目前仍屬於投資期,未來還要持續投入資金進行基建,要等5G真正商業化後,先係電訊公司賺錢嘅時間。現下資金追入,極有可能係因為股價過於低殘,小心彈散風險。

未係瞓身入市時機

不過,若然真係對電訊股情有獨鍾,不妨考慮中移,集團上周四業績公布增加派息,現價息率近6厘。公司佔據內地電訊市場半璧江山,大到不能倒,坐收高息,等5G收成,最多只係損失時間。而且中移上周反彈力度最強,由上周四低位反彈逾兩成,其餘兩隻僅升逾一成,相對而言,中移明顯強勢。

港股今次調整究竟見底未?老古都冇水晶球,只能給予少許建議大家控制注碼,暫時仲未係瞓身入市的時機,起碼要等到有確實的肺炎特效藥面世之後,環球股市才有望真正脫險。

古勝