絲絲講場：視像會議疫市旺場 騰訊洗「版」搶客

騰訊控股（00700）旗下一款雲視頻會議產品——「騰訊會議」，為咗迎戰呢個市場，話喺過去40日內急急更新咗14個版本，等用戶有更流暢、高清、安全、易用嘅雲端會議體驗，目的當然係想留住呢班客。

依家唔少打工仔Home Office，視像會議嘅背景就當然係自己家居，唔想屋企環境被其他人睇穿，都要搞搞虛擬背景，所以「騰訊會議」提供咗呢樣功能。

平台容許300人在線開會，咁多人發言，好難認到把聲，所以介面可迅速辨認講話者姓名。開會時覺得悶悶哋，亦可以中途「插嘴」，用彈幕畀下「OK」、「舉手」、「Like」、「鼓掌」等表情。

除咗股王外，喺美國上市嘅拼多多都靜靜雞搞埋企業通訊辦公室軟件Knock，而且內部已喺上年第四季開始試用，呢排已開始正式攻入市場。平台主要方便辦公室員工內部溝通，亦有語音會議，強調要做到保障企業私隱嘅效果。

美企Zoom年內累升七成

講開視像會議，不可不提專門提供相關業務、美國上市嘅Zoom Video Communications，佢簡直係逆市奇葩，美股大冧，隻股年內急升逾74%，好似周三美股大冧6.3%，Zoom反過來升咗6.8%。疫情擴散得愈快，隻股就升得愈急，因佢擺明係食到呢個大趨勢！

其實，大家有排都無法出差，就只可用視像會議，好似絲絲啲姊妹們咁，日日都要同外國同事視像開會。佢哋仲話，會尊重場合，化個靚妝先參與會議o架！

余絲韻