絲絲講場：債券天王跌出富豪榜？
新冠肺炎蔓延至全球，口罩成為性命攸關嘅必需品，價格炒得貴都算，最慘係有錢都買唔到！坊間有人講笑，話貧與富唔再用錢嚟釐定，而係用你擁有嘅口罩數量嚟定斷。如果係咁，類似「債券天王」富斯（Dan Fuss）級數嘅超級富豪，又會係咩階層？
豪捐口罩 自己唔夠用
網上流傳一個「最新財富排行榜」，以屋企有幾多盒口罩嚟區分富有程度。如果得一盒或以下，就係赤貧、2至4盒係低下階層、5至9盒係中產、10至30盒係有錢佬、30盒以上就係富豪。真係有趣！如果呢個排行榜真係存在，連「債券天王」話自己唔夠口罩用，唔通連佢都要被迫紆尊降Grade？
早喺農曆新年時，Dan聽聞新冠肺炎喺亞洲區傳染得好快，人心惶惶時，已主動問絲絲有咩需要幫忙，夠唔夠口罩用。絲絲好感動，但見自己嘅口罩都夠捱一個月，就婉拒咗佢嘅好意。而佢就繼續關心各國好友，義不容辭、出錢出力將口罩送畀有需要嘅朋友。
勢估唔到，之後歐美紛紛失守，包括Dan身處嘅美國麻薩諸塞州都有多宗新冠肺炎確診個案，而佢嘅口罩儲備都送得七七八八，亦無留多啲畀自己，因為佢話有好多人比自己更有需要，所以就用其他方法抗疫。佢無私嘅愛，絲絲只有敬意，而喺排行榜嘅高低又何足掛齒？絲絲更要主動幫佢搵口罩添！
余絲韻