絲絲講場：聯通王曉初巡舖督防疫
周一年初十，工始終要開，疫情下，唔少人都喺屋企Home Office。不過有個人，內地電訊界無人不識，平日相信都好難會喺門店見得到佢，但呢個疫症蔓延時，佢反而一個人落公司街舖「微服出巡」！
講嘅係中國聯通（00762）董事長兼首席執行官王曉初，佢被人「發現」初十當日，獨自去咗北京西單嘅聯通門店巡員工防疫情況，佢有同在場營業員交流，叮囑大家注意安全。
佢仲有五點防疫提示：盡量減少門店職員數量、營業員座位要拉開距離、向啲客推薦網上辦理業務、保證門店前線員工有齊口罩及消毒酒精、鼓勵員工帶飯盒或買返Office食等。
事後啲員工話，真係認唔出，原來係董事長！查實睇番網傳嗰張王曉初「微服出巡」相，佢呢個風褸、帽加口罩造型，好難認得出係佢！
中移老總高調現身
相反，中國移動（00941）董事長楊杰上周六（一日）落北京菜市口等門市「調研指導慰問」前線員工防疫，就高調得多。雖然佢一身便裝羽絨褸加口罩，但旁邊仲有副總經理董昕等成棚人，係人都知，領導駕到啦！
余絲韻