早在周三復市前，老古已表明「莫買當頭跌」，昨日周四仍着大家切忌心急撈貨。結果昨日期指結算過後，港股跌幅果然擴大，新春假後復市恒指兩日埋單唔見1,500點，市值蒸發逾兩萬億元，股民心情點會好過？最慘仲要周圍撲口罩，香港呢個衰運唔知幾時先至完！
昨日筆者在網站分析已指出，首季內地經濟增長將會「入伍」，即收縮至僅5%增幅。昨日交易時段見到有投行都有相同看法。事實上，疫情大大打擊中、港兩地的經濟活動，影響製造生產和消費需求。到底影響只在首季，抑或會蔓延至整個上半年，還須視乎疫情發展。在睇清楚局勢前，看官宜戒急用忍，不宜冒進入市撈底。
本來諗住新經濟股可以靠穩，誰知昨日就連騰訊控股（00700）及阿里巴巴（09988）都受壓，跌幅均逾2%，只是對比瑞聲科技（02018）及舜宇光學（02382）等製造類股份，跌幅還是相對細。連強勢板塊都要下跌，反映真係有錢走緊。老古雖看好阿里長期表現，但大環境始終不明朗，故暫時傾向觀望200元大關承接再作部署。
美國聯儲局一如預期維持利率不變，畢竟中國是全球經濟重要增長動力來源，經濟一旦硬着陸，美國都難獨善其身。聯儲局按兵不動，觀望疫情發展，實乃上策。
老古預計，今趟最壞情況，港股要落番24,500點水平，市場需要時間消化企業估值下調的影響，環球資金正持續減持中、港股份，轉投其他市場，致使兩地資產價格持續受壓。唔慣做淡友，唔一定就要做好友，唔做嘢離場觀望都係一個應對方法。順帶一提，小弟的專欄逢交易日在「東網Money18」的手機應用程式或互聯網頁（網址：money18.on.cc）刊登，歡迎瀏覽觀看最新分析。
古勝