絲絲講場：AI專家月薪10萬 最招「職」

根據社交媒體LinkedIn（領英）發布嘅年度「新興職業排名榜」，第一搶手職業係「人工智能專家」，基本月薪約10萬港元，過去四年需求以每年74%嘅速度增長！

「人工智能專家」通常係指專注機器學習同人工智能（AI）、探索邊啲領域用得着AI、同建構AI系統嘅工程師或研究員等。呢個工種連續三年名列熱門新興職業榜首。

識人際關係一樣搶手

講到人工，根據招聘網站Indeed資料，AI工程師於美國三藩市閒閒哋年薪都有12萬至16萬美元，計落即係月薪7.8萬至10.4萬港元！再勁啲嘅，年收入甚至上到25萬美元以上，即是月袋16萬幾港元，嗱仲未計其他福利！

就連Indeed本身嘅一九年度「25個最佳職位榜」，亦將「機器學習工程師」置於榜首，話呢個職位過去幾年招聘量勁飆3.4倍。

點解咁搶手？皆因現時乜行業都要呢類人才，明顯嘅係科技同汽車行業，但估唔到連高等教育同體育亦要請呢類職位。

事實上，新興職業十大中，至少有三類職業着重人際關係、溝通、解決問題同埋協作技能，分別就係「Customer Success Specialist」、「Sales Development Representative」及「行為健康技術員」。

所以話，人際關係幾咁重要呢，絲絲喺到恭祝大家新一年家和人和萬事和！

余絲韻