絲絲講場:滙豐派千萬元利是氹員工

滙豐銀行尋日宣布,香港員工人人獲派500蚊電子利是,銀碼同上年一樣!即使市道麻麻,封利是個「餡」都無縮到水,認真唔話得!

話說,滙豐員工尋日晨早就收到「一姐」滙豐香港區行政總裁施穎茵發出嘅內部電郵,話過去一年對員工表現好滿意,決定派500蚊大利是。聞說大部分員工會喺今日經出糧戶口收到錢。今次滙豐派利是,成兩萬名員工有份,夾埋即係派咗成千萬元!

講開企業派利是,排場之最,莫過於騰訊(00700)主席馬化騰九九年起每年親手派開工利是,幾千員工排隊(扌豆)。不過,騰訊日前公布,今個鼠年取消初八嘅總部(扌豆)利是活動!計落,可能係廿二年首次!

雖然佢哋冇解釋取消活動原因,但受肺炎疫情影響,內地已有唔少地方取消大型群眾活動,估計騰訊亦有呢個顧慮。

騰訊取消(扌豆)利是活動

咁又係,騰訊每年派開工利是,幾千人喺總部大樓由地面開始排隊,條人龍兜足30幾層樓,先可以親手接到高層封利是。

為搶頭彩,有員工甚至之前嗰晚八點幾就到場,等七粒鐘先喺凌晨三點幾攞到個頭籌!嗱呢個只係籌,要真正(扌豆)到封利是,仲要等到第二朝,即係排足十幾個鐘。所以啲員工有晒準備,會帶埋小摺櫈、豆袋梳化同飛機頸枕,公司亦會安排旗袍姐姐向大家派茶水同暖包,氣氛有如開嘉年華!

見慣騰訊年年將(扌豆)利是人龍排成「旺」字、「福」字,今個鼠年冇,絲絲有啲Miss添!

余絲韻