絲絲講場：財圈利是封 淡市勁「Heart」Sell
現時市道麻麻，各大金融地產企業出利是封亦無咁豪。但喺呢個慳得就慳嘅時候，仍有唔少好有心思嘅利是封設計，包括Die-cutting與拉敞、合體同含蓄等。
apm華懋玩Die-cut
今年金融地產界利是封當中，最令絲絲佩服嘅，絕對係Die-cutting加拉敞嘅設計。Die-cutting者，「軋形」或「裁形」也，係印刷品中常用加工手法，即是除咗直切以外其他形狀嘅剪裁或開窿等。
利是封Die-cutting開窿通常會配合拉敞設計，如新鴻基地產（00016）旗下商場apm嘅「笑口常開」拉出金牙仔、「心想事成」個心心敞出隻笑鼠。另外，華懋集團成立60周年嘅賀年封上，「60」二字就拉敞出祥雲瑞鶴。唔好睇小呢啲開窿設計，每個都要特別做刀模，可以話係落本！
和電麥格理夠噱頭
有啲利是封就玩合體，如UBS（瑞銀）、和記電訊香港（00215）同申萬宏源（06806）咁，幾個利是封拼埋可變成另一幅圖畫！為咗砌幅全圖攞個好意頭，唔該畀孖封或雙孖封吖！
講最深得絲絲心嘅，就係Macquarie（麥格理）嗰款，就咁睇只得紅色一片，睇真啲，其實有壓凸嘅暗花，幾咁含蓄！
余絲韻