絲絲講場：各地上市公司點揀CEO？

美企傾向有COO經驗

有啲國家特別鍾意做過首席財務官（CFO，或稱財務總監）嘅CEO，包括德國（全球佔比達29%）、挪威（28%）同瑞典（28%），而美國（52%）、法國（29%）同荷蘭（28%）就傾向任命有首席營運官（COO）經驗者做CEO。特別嘅係，全球只有5%嘅CEO有創業背景！

講到年齡，德國有30歲最年輕嘅CEO，美國就有89歲最老嘅CEO，兩者相差59歲！全球CEO平均年齡係56歲。

至於個位可以坐幾耐？全球計，54%嘅CEO任期唔到5年，33%唔到兩年，過到超過10年嘅唔夠四分之一人！個位穩坐到15年以上嘅，更只得8%！

與10年前相比，依家做CEO所需技能好唔同，所以亦出現一批新型CEO。

新型舵手挑戰全能

呢批新型CEO除咗要繼續履行同以前一樣嘅管理職責、維持日常營運同對股東負責之外，仲多咗好多其他嘢要顧，包括喺持續不斷嘅數碼同業務突破中Lead住隊Team、鼓勵員工、應付多樣化嘅職場文化、與不同嘅利益相關團體保持良好關係、仲要顧埋長期可持續發展……各位CEO，辛苦晒！

余絲韻