港股昨日（周一）叩29,000點未果，全日高位做28,971點，收報28,954點，升316點，成交達1,118億元。好明顯真係有資金入市追貨，觀乎昨日首兩大成交股份，分別為騰訊控股（00700）及阿里巴巴（09988），好明顯資金都在押注兩隻科網巨企股。其中，騰訊股價不但重上400元，更突破南非大股東前年的減持價405元，全日成交達到110億元，令人刮目相看！
有追開老古的，都知道呢期小弟一路都睇好隻阿里。若然有貨，要繼續耐心坐，等佢放紙鳶。至於騰訊，向上將觸及蟹貨區，短線高位或有反覆，但若然成交好似尋日咁威水，話唔定好快見420元水平。
新經濟股咁熱鬧，炒作今年同股不同權「染藍」開綠燈，咁搞法會聚到更多資金押注新經濟股，資金流提振股市氣氛。除咗阿里，美團點評（03690）都係「染藍」熱股。但就連閱文集團（00772）咁殘，呢浪都跟升，唔好低估新經濟股表現。故重申春節前係要整理吓投資組合，減磅超買傳統經濟股，但持倉就要保留龍頭新經濟股。
除咗科網股之外，晶片股亦見異動，華虹半導體（01347）急升15%；中芯國際（00981）升逾半成，短線有機會衝15元關。此外，兩隻年資相對大的科技股，還有金蝶國際（00268）同金山軟件（03888），昨日股價同升逾4%。短線金山軟件股價若能企穩在22元樓上，向上仲有空間，目標睇25元水平，穿20元關止蝕。
資金流入港股，升市叫人沽貨，似乎係阻人發達，但老古始終認為，確有需要調整組合加強攻防，風險管理永遠最重要。港府話今年擬推ETF通，呢單大製作講咗好耐，終有眉目。香港交易所（00388）股價隨之而上，昨升穿280元，收報280.2元，升1.8%。若短線年關因素未見太大獲利沽壓，港交所股價抽穿285元阻力位的話，呢一浪直望300元大關，穿268元止蝕。
古勝