Market Insight：亂世投資 有胡要識食
美國總統特朗普發表的講話沒有市場想像般兇狠，全球股市應聲回揚。恒指周四一度重上28,500點樓上，手機設備股及內需股發力。之不過，老古都係認為，農曆新年前可以逐步逢高減磅，謹記有胡食沽貨獲利唔會有錯，錯只錯在之後有冇因應情況再作行事。更何況呢兩個月港股真係升咗唔少，獲利過年沖喜吓，唔好貪勝不知輸。尤其係如今國際形勢時刻在變，投資者既然無法預測，惟有謹慎行事。亂世投資，賺錢其次，保本首要。
時值年尾，又係換新車等去舊迎新消費旺季，所以短期內消費股可以看高一線。見到昨日吉利汽車（00175）股價叩16元關，除了因為母公司與奔馳成立合營相關消息之外，相信與旺季銷情有關。若然市況就到，吉汽呢浪順勢踩油上，有勢試17至18元水平。
比亞迪挑戰及機遇並存
講到車股，其實中東局勢緊張，油價上升，對新能源汽車股唔係壞事，皆因可以鼓勵更多車主選擇新能源汽車。內地車市龐大，作為官方支持的新能源車龍頭企業的比亞迪股份（01211）應該有運行，誰知去年全年計汽車銷量僅46.1萬輛，按年減11%。一來因為市場增長開始飽和，二來經濟景氣轉弱，再加上新能源車的車企補貼逐步取消，內內外外的競爭日趨激烈。若然美資電動車企未來真的加大在內地市場的銷售，對比亞迪而言不無挑戰。
之不過，汽車業始終是重要產業，內地政府不可能讓本土車企這樣沒落下去，到底前年開始實施的新能源車雙積分制，未來幫唔幫到本地車企，5G技術能否吸引中、外車廠展開新的合作潮，一切睇政策風向能否帶動資金流。
古勝