絲絲講場：Apple收入唔夠靚 花紅勁縮

各位高管薪酬縮水，皆因公司銷售收入唔夠標青。Apple一八年銷售收入，超出目標一倍，但一九年銷售收入僅超出目標28%，各位高管花紅唔見咗截。

庫克獲派逾億美元股份

其中，首席財務官梅斯特里（Luca Maestri）同營運總監威廉斯（Jeff Williams），去年全年總薪酬均為2,520萬美元，皆較一八年約2,650萬美元縮水130萬美元，按年減幅約5%。

行政總裁庫克仲甘！即使去年嘅底薪同之前一年同樣係300萬美元，但與公司業績掛鈎嘅花紅就由1,200萬美元降至700萬美元，加埋啲保安費同私人飛機補助咁，佢一九年總報酬嘅現金部分係1,160萬美元，較一八年少咗410萬美元，即大縮26%！

不過咁，若然計埋庫克獲派嘅市值1.135億美元公司股份，佢去年總收入有成1.25億美元，較一八年嘅1.36億美元，只係「減薪」8%！點計都好，縮咗就係縮咗，風光背後始終有辛酸！

余絲韻