絲絲講場：ASM李偉光整犀利摩打 歐資佩服

話說，絲絲早排拜訪ASM太平洋（00522）行政總裁李偉光，講開佢公司喺金融海嘯後無幾耐收購西門子嘅表面貼裝技術（SMT）業務，即是將蚊滋咁細嘅電子零件，以機器快速精準咁砌埋一齊，機器入面嘅摩打當然一啲都唔簡單！

李偉光當時為將生產成本降低20%，於是由香港派咗一Team人去德國視察，想將原先由德國同瑞士公司入貨嘅摩打，改為自家研發。

班歐洲摩打供應商當然睇死香港，殊不知香港團隊大概一年就搞掂，連原西門子嘅德國工程師都佩服東方人呢份拚勁，加速埋公司內嘅文化融合。

講開，李偉光今年就會離開ASM太平洋退休，佢當年點由工程師變成跨國企業嘅掌門人？佢話，全靠獲舊老闆（ASM前董事總經理）林師龐信任，30年前將新開嘅新加坡分公司交畀當時無乜留洋經驗嘅佢「打骰」，仲同佢講「少少錯誤Afford得起」咁話。

晉升人才必睇工作熱誠

到佢自己做話事人，佢揀人升職最睇就係工作熱誠與團隊精神，「一個人有熱誠通常就會全心全意投入，成功咗一半！」

不過，佢亦留意到，香港企業家早年可能「第一桶金」賺得太易，所以會忽略長期投資。佢慶幸股東支持公司以長遠眼光看待發展，話說○八年雷曼「爆煲」後，訂單一下子暴瀉，好在公司放低未蝕過錢嘅包袱，並無放棄研發，結果迅速捕捉到嘯後行業復甦，原先較保守嘅同行之後都陸續跟風！

余絲韻