絲絲講場：UNIQLO摺衫考起機械人

快速時裝（Fast Fashion）向來講求快、狠、準，務求以最快速度「散貨」！最近日本服裝品牌UNIQLO母企迅銷（06288）公布，佢哋東京旗艦倉衝向全自動化，由機械人取代人手！

由於日本人口老化，勞動力不足等種種原因，佢哋東京旗艦倉其實舊年已經用機械人取代咗九成工人，其餘10%當時取代唔到嘅人力工作，你估係乜？就係摺衫！

唔好睇少摺衫，Fast Fashion服裝款式日新月異，每款衫需要配合包裝嘅摺法都唔同，機械人要將啲衫分類有難度！即使電商巨頭亞馬遜都要靠真人完成選貨程序！

為咗攻破埋嗰10%人力，迅銷同日本初創企業Mujin合作，成功研發出一款有兩條臂嘅機械人可以揀啱件T恤、摺好然後包裝！但聽講，呢個機械人仲未係萬能，將Heattech底衫摺好入膠袋無難度，但若改為入紙袋包裝就仍有啲困難咁話。

余絲韻