絲絲講場：貝索斯膺「最佳商業領袖」
全球網購一哥亞馬遜（Amazon）創辦人貝索斯（Jeff Bezos），被評為「十年來最優秀商業領袖」。重點係，選佢出嚟嘅唔係絲絲呢啲凡人，而係全球主要大型企業嘅精英CFO（首席財務官）。
全球百三位CFO選出
美國財經媒體CNBC嘅「全球CFO理事會」（Global CFO Council），集合咗世界上一啲最大嘅上市公司同私營企業嘅CFO，成員大概有百三位左右，佢哋管理住多個行業共約5萬億美元（約39萬億港元）市值嘅企業，佢哋不時會就住企業舵手所面對嘅問題發表意見。
十一月至本月初期間做咗嘅一項調查顯示，近三分之一嘅受訪「全球CFO理事會」成員認為，貝索斯係呢十年來最具影響力嘅商業領袖！其他上榜嘅企業高管仲包括微軟CEO納德拉（Satya Nadella）、蘋果公司（Apple Inc.）CEO庫克、「股神」巴菲特、摩根大通CEO戴蒙等。
個人身家超過8千億
貝索斯於20世紀90年代中期建立網上書店亞馬遜，一五年亞馬遜超越沃爾瑪成為美國最大嘅零售商，貝索斯今時個人身家已超過1,090億美元（約8,502億港元）！佢人生大贏家到咁，絲絲冇嘢好講。
余絲韻