絲絲講場：小加做滿十年攞金牌具意義
唔經唔覺，香港交易所（00388）行政總裁李小加已加入該所十周年，喺該所早前舉行的派對中，李小加就獲發十年金牌，足一両重o架！依家一両金價值萬多港元，對李小加嚟講係濕濕碎，但所謂物輕情義重，相信佢收到後都會好開心。
港交所表揚長期服務員工
港交所以往每年十二月都會舉行周年晚宴，除咗畀員工玩番晚，仲會喺晚宴中向任職十年及廿年嘅員工頒發長期服務獎。聽聞今年周年晚宴改咗期，於是港交所早前就於金融大會堂安排咗個派對表揚長期服務嘅職員。
李小加○九年十月中以候任行政總裁身份加入港交所，今年啱啱好十年，適逢阿里巴巴（09988）近期回歸香港第二上市，令香港有望蟬聯全球新股集資額一哥，奠定本港作為中資科網股集資中心地位，令李小加喺佢嘅十年「成績表」中再添一績。呢個十年金牌，真係別具意義。
至於喺港交所服務廿年，亦有幾位，但做滿廿年嘅就唔係收金牌，而係靚錶一隻！話時話，唔知李小加個金牌有冇刻上佢個名嘅呢可？等絲絲再八吓先。
余絲韻