絲絲講場：華懋飯堂驚喜預祝聖誕

高管裝飯「添髀」慰勞員工

見到Donald同埋HH着晒圍裙，又戴埋手套，企足45分鐘，不斷咁樣幫同事裝飯夾餸，就連銷售部總監吳崇武都話自己「受寵若驚」。

聽講今次係預祝聖誕，尋日嘅「是日午餐」三餸一湯菜式入面，除咗有炒椰菜同埋番茄炒蛋，仲有最受同事歡迎嘅炸雞髀。Donald仲主動向每個同事提出「添髀」！即係畀兩三隻雞髀同事，怕佢哋唔夠飽咁話。

之後Donald同HH仲坐低同成班同事一邊食飯，一邊閒話家常，個個當然把握機會踴躍發表對飯堂嘅意見，同事仲大讚佢兩位夠貼地又體貼！有位做咗五年嘅員工話，能夠與Donald及HH近距離接觸同對話，機會好難得。

絲絲仲聽講，尋日去到飯堂食飯嘅員工，比平日多咗三分之一，唔知到底係炸雞髀吸引，定係Donald同HH有號召力呢？

余絲韻