港股魚缸悶局一場，周一全日成交僅670億元，阿里巴巴（09988）上市又如何，一潭死水依然故我。點解會咁？香港經濟差，港企缺乏投資價值；貿易談判膠着，資金對中資股亦抱觀望態度，大家都企晒喺度，冇咩好做，或者提早收爐，冇眼屎乾淨盲！
講到收爐，尋日卜架行幾個股友大叫救命，皆因買咗某航空公司機票準備提早收爐外遊，點知如今間航空公司唔知仲捱唔捱到下個禮拜，搞到要以高一倍價值買其他航空公司補飛。其實呢家公司有問題唔係新聞，但用家都要幫趁，一來係貪平，二來部分航線時間較好，最後就係博佢死唔去，點知依家就好似買咗問題股仔咁，真係可能要無期停牌甚至除牌，變相要撇帳。
仲留喺場嘅資金，仍然響幾個中資板塊玩對對碰。上個禮拜醫藥股玩落閘放狗，今個星期就到內房股炒上，中國恒大（03333）及融創中國（01918）同升6%。汽車股都好似想試水溫，吉利汽車（00175）、廣汽集團（02238）及華晨中國（01114）升1至2%，反正冇炒一排，不妨睇實成交，睇冇有得短炒一轉。
香港十月份零售貨值按年跌24%。數據差早喺預期之內，相關股份跌幅亦已作反應。反而見到化妝品零售股莎莎國際（00178）宣布終止新加坡業務，以集中資源拓展港澳、內地及馬來西亞市場，顯見公司積極重組集團業務。因應舖市調整，以及上半年社會動盪反有助推動電子商貿，估計公司會繼續着手重整香港業務。其實，投資者宜以平常心看待每個行業的周期，更重要係觀察企業應對淡風的積極性，自可發掘新周期的明日之星。
古勝