絲絲講場：華懋環保賀聖誕 舊水晶燈變藝術品
華懋集團嘅舊水晶燈無端端變咗藝術裝置！話說，喺香港著名新媒體藝術家鮑藹倫手上，嗰盞如心酒店舊水晶燈，再加埋復古電視機同影片，就成為一件名為《火舞》嘅藝術裝置。
回收舊燈泡創作成「蟻」
呢個係華懋搞嘅聖誕公共藝術項目「但願-光芒再現」，佢哋之前向公眾回收咗嘅舊燈泡同舊光管，部分用嚟畀一班藝術家Upcycle創作咗九組藝術品，批藝術品上周三起於荃灣如心廣場展出，直到明年二月底。
閣下捐嗰個燈泡，會唔會已經變成作品《大我、小我》內其中一隻「蟻」？至於有華懋盞舊水晶燈嗰件藝術裝置《火舞》，話係「演繹生命的開始及過去」，你Feel到嘛？
By the way，佢哋嘅回收舊燈泡舊光管，收一件捐10蚊助長者活動仲繼續緊，直到今個月尾為止。
余絲韻