環球投資市場氣氛本來喜氣洋洋，不過成也蕭何，敗也蕭何！中美首階段貿易談判突現變數，投資者自然聞風而動，人民幣轉弱重新跌破七算，中港股市急跌，滬綜指周一跌1.8%報2,909點；恒指急插724點報26,926點，主板成交865億元，似乎部分股市投資者選擇在政治市下清貨走人，何解？
先睇外圍，中美兩國本來傾得幾好，又傳首階段貿易協議將於十一月尾或十二月中簽訂，豈料轉頭又見反枱，美國總統特朗普日前指美國尚未同意全部取消已對中國加徵的關稅。中國亦不甘示弱，內地官媒指，若不取消關稅，中美肯定達不成第一階段協議。
再睇內部因素，香港社會動盪有愈演愈烈趨勢，繼零售及旅遊業等行業外，亦逐漸打擊飲食、娛樂及運輸等行業。最重要的是，以往市民只要選擇不到高危地區即可，惟現時如一眾商場、學府及民居皆受波及，咁就唔係你話想避就避，而是「避無可避」。
有人話政治未必關經濟事，但大家睇睇中美開始貿易戰後，環球股市表現，再睇埋昨日市傳周二及周三停市後，整體港股表現（避險股都冇避險功能，都係跟住齊齊跌，且臨近收市毫無彈力，投資者明顯要錢唔要貨），皆反映出政治絕對影響經濟！
恒指上周向上突破五月至今下降軌阻力，高見27,900點，並上破250日牛熊分界線，但昨日卻低見26,830點，牛熊分界線得而復失，9日RSI為45，MACD牛叉快速收窄，走勢轉弱，短期內若不能重上及守穩兩萬七關，大家慎防港股在內憂外患下，將會有第二波跌勢，故宜以守代攻。
古勝