絲絲講場：鍾絳虹搞新股App貼錢打工？
有「新股女王」之稱嘅卓佳商務部董事總經理鍾絳虹，最近又有新意思，搞咗個專為散戶白表申請認購新股嘅手機應用程式——IPO App。所謂「力不到，不為財」，為咗搞好個App，同滿足用家需要，過往從未試過網上購物、就連淘寶都未淘過嘅佢，親自下載咗坊間好多唔同Apps，了解吓用戶透過App開戶口、購物、畀錢等運作。
買衫了解網購運作
愛美係唔少女士嘅天性，「女王」亦唔例外，佢揀App下載，首選就係買衫App！佢用咗幾個買衫App，有本地、外國等。
未試過猶自可，佢一試就瘋狂愛上，話用App買衫方便好多，因為就算有大量款式，用App睇清楚好多，唔會花多眼亂。就係咁，佢短時間內就掃咗唔少貨，最少花費幾千蚊，佢笑言真係「貼錢打工」！計絲絲話，呢啲錢都濕濕碎，最緊要係有靚衫着之餘，又可了解App運作，一舉兩得。
「女王」仲話，App咁方便，以後都會多啲利用App購物。言下之意，係咪叫股民都應該多啲用IPO App認購新股呢？
余絲韻