Market Insight：內憂外患 港股短期冇運行
影響港股的「內憂」與「外患」持續，但前者影響力日深，而兩者其實又息息相關，事關美國講到明港府如何處理社會事件，將影響中美貿易談判之決定。不幸的是，政府上周五突宣布引用《緊急法》，訂立《禁蒙面法》，周六起實施，港股當日午市急跌，外媒高調以「香港使用緊急法」作標題，這或多或少增加市場對資金進一步自香港撤走的憂慮。
講真，地產股、零售股及旅遊股近期股價級級向下，只可以被視為受影響的第一梯隊。香港示威活動愈演愈烈的情況看來（香港八月份零售業總銷貨值按年跌23%，為有紀錄以來最大單月跌幅），未來經濟大受打擊已是預期內之事。最慘係，中美貿易戰高級別談判快展開，但香港咁亂，係咪送了一隻好棋給美國總統特朗普就未知，但市場不明朗因素上升就一定，港股短期內都冇乜運行。
歐美議息紀錄惹關注
睇番本周時間序，除卻周一假期，只得四個交易日，外圍重大數據消息就冇乜，較值得留意的是周四的美國及歐洲兩間央行公布貨幣政策會議紀錄，當中美國於議息會議上，究竟有幾多個委員提及QE放水甚至其他較激烈的刺激經濟措施，或為經濟政策動向帶來啟示。
策略上，現階段買香港業務較重的個股或板塊輸錢機會甚大，本港地產股、旅遊股及零售股等真係不宜沾手。不過，就算大家睇好中資業務較重的板塊，隨時要面對中美貿易談判的影響。而且，就算內需股近期重新轉強，惟中線仍受整體經濟增長放緩拖累，點計數只係跌幅少過大市，而唔係幫大家贏錢，都係暫時靠邊站最穩陣！
古勝