Market Insight：港股乏方向 宜守不宜攻

本周二係內地十一假期開始，此前滬港通南北向都開始暫停，直到下周二先回復正常，港股無咗內地條「大水喉」就即刻無力。外圍方面，又真係隨時吹無定向風，事關要慎防「侵侵」晚上亂吹幾句，港股就變晒形。睇埋經濟數據，今日雖有官方及財新公布的中國製造業採購經理指數，但之後整周中國都冇重大數據公布，大家可從上述數據，分析貿戰對中國製造業影響。

留意美就業數據評估市況

周二則有澳洲央行公布議息結果，市場現時預期將會減息0.25厘，至0.75厘。需要知道的是，澳洲乃商品大國，而商品市場又正正與製造業以至環球經濟後向息息相關，連澳洲都減息，市場又會點睇環球經濟後向呢？

此外，澳元作為傳統高息貨幣，但息率一減再減下，與美國息差已收窄，這會否增加美國減息決心？值得留意，部分市場人士關注美國十月底議息會議上，宣布恢復大規模買債機會，暗示環球經濟前景悲觀。咁又有乜方法可以預視發生災難的機會率？其實可留意周五美國公布的九月失業率，及非農就業職位變動數據，有助大家對美國經濟與就業市場狀況的了解。

港股缺乏方向，相信短期要麼在26,000點整固，要麼反覆下試八月低位24,899點，所以建議部署時宜守不宜攻，保本為上！

古勝