近期投資市場本來都幾靜，豈料昨日新世界發展（00017）突然公布，捐出300萬方呎農地給社企作社會房屋之用，究竟這個「行為」會否擴散至其他地產發展商，並對本地樓市造成影響？相信投資者都會感興趣。
說實話，這類「社會責任」行為，以往都經常會出現（例如某集團捐錢給社企飯堂，讓有需要人士可免費用餐），不過今次涉及土地問題，加上早前又有團體表示贊成政府使用《收回土地條例》這尚方寶劍來增加土地供應，這難免令人聯想到，未來樓市格局會唔會有變。
從基本面睇，農地發展以往都比較難攪，事關表面上多個政府部門都唔多合作，令發展商有心無力，但底子裏，其實是政府難以平衡多方利益分配，擔心隨時產生更大的利益衝突問題，故一直未有沾手農地開發問題。
事實上，地產商所提出的合作農地，會唔會係唔完整及位處偏遠地區（例如未收齊的一整幅土地），故未來唔排除部分地產商會假借與社企合作之名，實為推動政府使用尚方寶劍來收地建屋。重中之重的問題是，「農地改建」必然要經歷種種難關，而這往往存在不可預知的變數，故相信有關行為唔會對本地樓市的短期供應帶來太大影響，至於長線影響則有待當中細節再公布而分析了！當然，大家今日可以睇睇新世界發展以至其他地產股走勢，就最反映出市場睇法，因為真金白銀往往最老實。
回看地產股基本面，美國九月已減息一次，市場預期直至十二月底，美國減多一次息到1.5至1.75厘的機會率為51.1%，減息到1.25至1.5厘機會率則為26.5%，而維持現時息率的機會率亦有22.4%。意味着年內再減0.25厘機會最大，咁對息口敏感的地產股有多大刺激就未知，惟從近期一眾地產股股價走勢與香港經濟前景未明考慮下，美國就算再減息僅能撐住股價唔跌，但要股價大升機會可謂微乎其微！
最後，各大手機商都已陸續發布新旗艦手機，但市場普遍認為冇乜驚喜，加上貿易戰前景未明，一眾手機設備股又再腳仔軟，瑞聲（02018）及舜宇（02382）昨日分別跌3.1%及3%，而通達（00698）更跌8%，睇走勢已經樣衰衰，短期都係暫靠邊站最穩陣。
古勝