絲絲講場：美企推機械狗有錢買唔到
機械人就聽得多，機械狗你又有無見過？美國波士頓動力公司（Boston Dynamics）研發嘅機械狗Spot（前身叫Spot Mini）絕技多籮籮，首先佢力大無窮，集合十隻Spot可以拉得郁一架貨卡車之餘，仲識得自己開門，同埋化身做「實Q」喺室內巡邏添。
如果以上技能都吸引唔到你，咁大不了就好似亞馬遜CEO貝索斯咁，當佢係一隻寵物狗，得閒帶佢行街，就型到爆啦！可惜佢暫時只係非賣品。
首批數十隻 識巡邏跳舞
家陣Spot只租不賣，除非你係一家有創意嘅公司，波士頓動力先會認真考慮吓，或者會賣一隻畀你。而首批推出嘅Spot只有數十隻，同先前計劃推出100隻少咗一大截，所以話更加矜貴！
至於Spot嘅功能十分先進，可以前往指定嘅目的地，沿途識得避開障礙物，喺遇到極端情況下仲識保持平衡，包唔會跌倒。
商業化嘅Spot用嚟做「實Q」係大才小用，佢最啱用喺檢查氣體洩漏服務，佢裝上甲烷探測器，就可以去檢測懷疑有氣體洩漏嘅地方。
另根據電腦程式，Spot擅長各種高難度舞蹈動作，波士頓動力已經同國際知名嘅雜技團——太陽劇團合作，隨時會捧佢做舞蹈明星添。
余絲韻