絲絲講場：富瑞9•11捐交易佣金
富瑞尋日（九月十一日）來自美國、歐洲及亞洲嘅股票、固定收益同外匯交易嘅佣金，零落袋？！啲錢去咗邊？原來佢哋全數捐晒去受颶風多利安侵襲嘅巴哈馬賑災！
全球賑災 先後九次
佢哋全球3,656位員工，亦可選擇將自己尋日嘅人工捐出。此外，富瑞亦會以公司名義直接再捐多100萬美元。啲捐款會分派畀一系列賑災資金，直接用於援助復原工作嘅慈善機構。
睇番，原來富瑞已經唔係第一次將一日嘅交易佣金等捐出，去為受颶風、地震、海嘯及恐襲等影響嘅世界各地賑災，由二○○一年開始計起，今次已經係第九次，而對上嗰八次總共捐咗3,460萬美元（近2.7億港元）！至於上一次捐錢，就係二○一七年嘅哈維颶風嗰陣，當時捐咗500萬美元，唔知今年又會捐幾多呢可？
余絲韻