絲絲講場：金管自爆打大鱷絕密行動

同券商主腦傾戰術

佢自爆當年單拖同香港三大證券行主事人飲咖啡「密會」，討論點樣入市掃貨。

依家講緊打大鱷喎，當然唔可以走漏風聲啦，陳德霖話，當時為咗查證行動保密有無曝光，轉個頭返到公司呢，特登叫唔知內情嘅金管局交易室同事，喺市場上四處打探吓點解港股無啦啦急升，好在收番嚟嘅訊息無提及政府入市干預，睇嚟佢真係好識「做戲」。

設作戰室 直接落盤

至於嗰十日嘅作戰細節，佢亦都好罕有地公諸於世。當時佢召集咗一個「戰事」小組，喺負責儲備管理嘅助理總裁葉約德間房，設立咗一個「交易作戰室」，仲裝咗幾條有錄音功能嘅電話線，可直接向券商下達指令。因為入市行動具有高度嘅市場敏感性，啟動之前必須絕對保密，所以佢哋得幾位同事參與。

當一場無硝煙嘅戰役結束之後，隨之而來就係重建市場信心。當年，金管局動用外匯基金打大鱷，被國際指摘違背自由市場原則，但佢話呢個係「痛苦而必須做嘅決定」，加上參考鄰近地區嘅經驗，一旦香港金融體系因為投機活動衝擊而崩潰，後果更加不堪設想，惟有係之後頻頻出訪，去唔同國家解釋番入市嘅理據。

余絲韻