絲絲講場：特朗普Twitter威力摩通設指數追蹤
美國總統特朗普（侵侵）愛用社交平台Twitter發表言論，其推文不時掀起全球市場波動。為此，摩根大通分析師創立咗隻指數，追蹤侵侵推文對美國利率影響。
最玩嘢係摩通呢隻新指數個名「Volfefe」，取名侵侵一七年時一條Tweet上一個無厘頭字眼「press covfefe」，當時無人明佢究竟係指「Press Coverage」（媒體報道）定還是「Press Conference」（記者會）。Anyway，侵侵唔識字被人笑亦唔係第一次，佢曾將「Unprecedented」（前所未有的）串錯為「Unpresidented」（沒有總統的）！確實前所未有過咁嘅總統！
對利率有明顯影響
講番個Volfefe指數，摩通話，可以解釋到隱含波動率當中嘅「可衡量部分」，於兩年期及五年期利率尤為明顯咁話。
摩通分析，自一六年初以來，特朗普向佢6,400萬位Followers平均每日發10條推文，一七年就職後共發布咗1萬條Tweet；於就職典禮舉行前，曾減至每日5條，但去年底開始回升，今年八月嘅數量更達到過去四年以來最多。佢大部分推文集中於美國時間中午至兩點發，尤其係一點鐘，推文機會比其他時間多兩倍！唔通呃Like食Lunch開胃啲？
摩通又發現，過去一個月特朗普所發推文中影響市場嘅數量激增，而包含「中國」、「十億」、「產品」等字眼嘅推文，最影響到個市，但就似乎最呃唔到Like或轉傳！
余絲韻