絲絲講場：格力珠姐狂Sell神奇電飯煲
講開女高管嘅「堅韌不拔、有審美感」，絲絲立即諗起格力電器（000651.SZ）董事長董明珠，珠姐最近公開話，煮飯用格力電飯煲，血糖唔升高！堅定流就未知，但就惹起網上熱議，仲由內地講到去台灣！
新款飯煲啱「三高」人士
話說珠姐最近猛話格力唔係齋出冷氣機，佢上月初上央視節目，話見咁多中國人去日本搶買電飯煲，自己幾心痛，泱泱大國都出唔到個好嘅電飯煲！於是要格力研製「世界上最好的飯煲」，仲用咗4噸米嚟做研究。
眨下眼，珠姐上月底於中國質量協會成立40周年紀念會公開話，公司研製出啱晒「三高」人士嘅飯煲！珠姐此言一出，網上起哄到底係真唔係。
有網民從人類學角度分析，話呢類「降糖電飯煲」，靈感可能來自雲貴川一帶嘅「甑子飯」做法，（絲絲唔夠位寫，想知嘅，閣下自己上網查）；有人就科學分析米粒與米水分離過程中嘅澱粉質變化；有人就玩嘢話，個飯煲大概會根據用家嘅生理狀況，而自動將胰島素加入飯內……
最特別係，今次仲由內地網熱議到台灣！無他，大家同樣都係食飯嘅。
余絲韻