絲絲講場：內地豉油股市值勁過萬科！
內地一樽豉油賣十元八塊，計落要成幾十萬支豉油錢先可買到一層樓。但估唔到，賣樓竟然唔夠賣豉油勁！講緊係內地上市醬油股海天味業（603288.SH），上個月尾開始，市值跑贏內地房產股龍頭萬科A（000002.SZ）！
海天味業身價三千億
海天味業係中國最大醬油生產商，專出豉油、蠔油同調味醬，以尋日收市價計，公司市值去到3,069億元（人民幣‧下同），相比萬科A股市值只得約2,886億元！
市值超萬科，憑甚麽？就係憑佢股價自四月初以來累升咗超過三成，同期萬科A股價就跌逾16%。
怕且關中美貿戰事，場仗睇嚟會鬥長命，內地政府必會谷內需去撐經濟，投資者於是湧入消費股避險；另一方面，「房住不炒」政策下，地產股走勢相對呆滯。
8房企總和不及茅台
不過，豉油勁極都未夠白酒嚟！以昨日收市價計，五糧液（000858.SZ）市值已去到5,492億元，而A股股王貴州茅台（600519.SH）就去到1.43萬億元，即是一家茅台市值仲多過八大內房企總和！邊八間？就係萬科A、華潤置地（01109）、中國海外發展（00688）、中國恒大（03333）、碧桂園（02007）、保利地產（600048.SH）、招商蛇口（001979.SZ）及龍湖（00960）。
依家摩根士丹利仲吹奏摩笛，話睇好茅台未來六至十二個月股價前景，大手調高目標價近兩成，由1,133元抬高到1,350元。受消息吹捧影響，茅台股價尋日又破頂，見上市以來盤中新高1,151.02元，收市仍Keep到報1,140元，微升0.11%。睇到呢度，你揀豉油、酒定係樓？
余絲韻