上周五剛過89歲生日嘅股神巴菲特話，人生係咪成功，成世人嘅終極測試就得一個，就係計吓以下呢條數！計數機就唔使，之但係都要準備下，絲絲怕閣下有玻璃心。
股神話去到呢個年紀，要量度人生有幾成功，只要數吓嗰啲想佢鍾意自己嘅人當中，有幾多個真係鍾意自己！
佢仲話，人生走到尾，若原來無人真心鍾意過自己，話之你幾有錢，你嘅人生都只係一場災難，一世枉過。
而咁多你想得到佢哋愛嘅人當中，最重要嘅，莫過於你嘅配偶，所以佢話，要有智慧地去搵你嘅終身伴侶。
巴菲特自己搵到冇？應該叫做搵到，就係佢前妻Susan，但唔係終身。股神話自己好幸運能遇上Susan，受佢引領認識人權、女權，Susan鼓勵佢捐出身家投入慈善。股神話有Susan嘅灌溉，先有今日嘅自己。
唯一係，兩人之後分開生活，但就無離婚，關係仲Keep住好密切，聽講股神之後同Astrid Menks發展戀情，就係Susan從中幫忙。直至Susan去世後，Menks先成為股神第二任太太。
講到呢度，你自己條人生數，又計成點？
余絲韻